ياترى ايه اللي بيحصل في سوق الدهب بره وجوه والأسعار رايحة على فين وليه كل التوقعات بتقول إنه هيزيد وهيرفع بشكل كبير رغم حالة الاستقرار النسبي وايه الحدث اللي هيقلب سوق الدهب في العالم.. خليكم معانا وهنعرف ايه اللي بيحصل
سوق الدهب ملهوش كبير وسهل جدا تعرف من بعيد الاسعار رايحة على فين لأننا سبق وقلنا إن الدهب سلعة حساسة وسوق بيتأثر بأقل حدث على المستوى العالمي وشفنا الاسعار ازاي قفزت لمستويات تاريخية في الايام اللي فاتت بسبب العقوبات الامريكية على روسيا والحرب التجارية مع الصين واللي بنكها المركزي سحب كميات ضخمة من الدهب من السوق العالمي وده تسبب في نقص المعروض وارتفاع الأسعار.
طيب ليه الدهب رايح للسحاب؟
زي ماقلنا سوق المعدن الاصفر ليه علاقة مباشر بالاحداث اللي بيسموها الجيوسياسية يعني بؤر الصراع في العالم سوءا سياسي أو عسكري خاصة لو بين دول قوية زي الصين وروسيا والولايات المتحدة ومعاهم اوروبا وكل الدول دي بينها أزمات كبيرة وصراعات على التجارة وبسبب اللي بيحصل في اوكرانيا وده غير اللي بيحصل في المنطقة حلولينا ولأن كل الأزمات دي وتيرتها بتزيد يبقي الدهب هيفضل سعره يزيد لأنه ملاذ آمن الدول بتلجأ ليه عشان تمتص أي صدمات نتيجة الصراع التجاري والسياسي بين القوة الاقتصادية العظمي
طيب ايه هو الحدث اللي هيقلب سوق الدهب في العالم؟
شوف لو متابع الأزمة الروسية الاوكرانية واللي كانت السبب إن العالم كله يعاني بما فيهم مصر واللي دفعت فاتورة كبيرة بسبب ارتفاع الاسعار عالميا مع بداية المشكلة ولأن الدولتين من أكبر الدول اللي مصر بتستورد منهم قمح وحبوب ومواد غذائية وبسبب المشكلة دي بردو مصر حصل عندها أزمة حادة في نقص الدولار طول السنة اللي فاتت بسبب خروج الاستثماات الساخنة وظهور فجوة دولارية كبيرة استغلتها السوق السودا واللي دخلت تضارب على الاسعار لغاية قرار البنك المركزي المصري بتحرير سعر الصرف.
المهم في الساعات الأخيرة المشكلة بين اوكرانيا وروسيا خدت بعد تاني بيشير إن الحرب بينهم هتفضل مستمرة بسبب الدعم الغربي لأوكرانيا واحتمال استهداف البنية التحتية الروسية وضيف على ده تصاعد الأحداث عندنا غفي المنطقة وده كله بيضغط على سوق الدهب العالمي بسبب ارتفاع الطلب عليه وزيد على ده كله اتجاه بنك الاحتياطي الفدرالي لخفض سعر الفايدة على الدولار وده أكتر حاجة بترفع سعر الدهب وشفنا البنوك الاوربية خفضت ازاي سعر الفايدة في الايام الأخيرة وده كله بيدعم الطلب على الدهب.
يعني ببساطة واختصار سوق الدهب العالمي رايحة لزيادات كبيرة وبالتالي السوق المصري هيتأثر بشكل كبير والتوقعات بتقول بناء على الارتفاع العالمي لسعر الدهب في العالم سعر الجرام 21 في مصر هيزيد 4 الاف جنيه وهيوصل 5 الاف جنيه في غضون شهور مش سنين وعشان كده الاستثمار في الدهب دلوقتي هو وقته المناسب.
التعليقات