التخطي إلى المحتوى

 

 
التعديل والتغيير الوزاري واحد من اهم الموضوعات اللي بتشغل بال ناس كتيرة في الشارع المصري، يا تري مين اهم الوزراء اللي مكملين معانا في الحكومة الجديدة ومن ابرز الوزراء اللي مش مكملين ومن الوجوه الجديدة اللي هتكون ضمن التشكيل الجديد
 

من يوم تقديم حكومة الدكتور مصطفي مدبولي باستقالتها للرئيس عبدالفتاح السيسي والكلام كتير عن الوجوه الجديدة اللي هتدخل الحكومة ومين الوجوه اللي هتكمل معانا في الحكومة للفترة الرئاسية الجديدة ومين الوجه اللي مش هتكون موجودة في الفترة الرئاسية الجديدة، خصوصا ان الفترة اللي فاتت كان فيها ملفات وازمات كتيرة عاني منها المواطن المصري خصوصا في الملفات الاقتصادية والخدمية .
بعد اجتماع الدكتور مصطفي مدبولي والرئيس عبدالفتاح السيسي وتكليف الحكومة بتسيير الاعمال لحين الانتهاء من التشكيل الوزاري الجديدة، وطلعت اخبار من هنا وهناك عن الاسماء اللي هتكمل معانا في الحكومة الجديدة والاسماء اللي مش هتكون موجودة واللي تضمنت مفاجات بالجملة عن رحيل وزراء حققوا نجاحات كبيرة  خلال فترة وجودهم علي راس وزارتهم .

مصادر حكومية، اكدت أنه تم إجراء البروفة النهائية لأداء اليمين الدستورية للحكومة الجديدة داخل القصر الجمهوري بالعاصمة الإدارية الجديدة، وأن حلف اليمين سيكون بالعاصمة الإدارية .

المصادر كملت كلامها وقالت أن بعد بكرة الأربعاء هيكون موعد إعلان التشكيل الوزاري الجديد واللي هيتضمن نواب لرئيس مجلس الوزراء، وأن اختيار الوزراء الجدد تم بناء على الشفافية، وخبراتهم، وكفاءاتهم، وتميزهم في تحقيق الأهداف المطلوبة منهم.  

المصادر نفسها قالت إن في اتجاه لاستحداث وزارة جديدة لشئون مجلس الوزراء، ومن ضمن المرشحين للوزارة دي مستشار بارز ظهر قوي في الأيام اللي فاتت وسيدة شغالة في مجلس الوزراء .

طيب مين من الوزراء متوقع تغييرهم في الحكومة الجديدة ؟.
المصادر قالت كمان أن التغيير الوزاري هشمل وزراء التجارة والصناعة وأن المرشح المحتمل  لتولي منصب وزير الصناعة هو أحد أعضاء مجلس النواب الحاليين، ده غير أن التغيير هيضم وزير التنمية المحلية، وهيتولي واحد من رؤساء لجان مجلس النواب المنصب في الحكومة الجديدة، ده غير أن فيه اتجاه قوي لعودة وزارة الاستثمار في التعديل الوزاري الجديد؛ وده للعمل علي تحسين بيئة الاستثمار، وجذب المزيد من الاستثمارات المحلية والأجنبية أو عودتها ودمجها مع وزارة التعاون الدولي.

المصادر قالت كمان أن في أحد مديري البنوك مرشح لتولي إحد الوزارات، ده غير وجود رئيس هيئة مرشح لتولي وزارة تانية من الوزارات الاقتصادية، ونائب لأحد الوزراء مرشح لتولي وزارة من المجموعة الاقتصادية برضوا في التشكيل الجديد للحكومة .
اما عن وزارة الأوقاف والكلام اللي كتير عليها في الأيام اللي فاتت، فالمصادر قالت إن في مرشح من الأزهر الشريف لتولي وزارة الأوقاف، ده غير وجود  مرشحين لوزارة العمل منهز رئيس أحد النقابات ووكيل وزارة العمل بأحد المحافظات الساحلية، بالإضافة إلي ترشيح رئيس شركة قابضة لتولي أحد الوزارات، وكمان في قاضي شغال مساعد لأحد الوزراء مرشح لتولي احدى الوزارات، ده غير مساعد لوزير الداخلية هو كمان مرشح لتولي أحد الوزارات الهامة، واخيرا ترشيح دكتور جامعي مرشح لتولي احد الوزارات التعليمية في الدولة .



مصدر الخبر

التعليقات