جوزي بيحلف بالطلاق على طول زي بتاع البطيخ.. ميار الببلاوي ترد على الهجوم عليها: ربنا يحسسكم بوجع الشريفة

الأحد 28/أبريل/2024 – 01:20 ص

نشرت الفنانة ميار الببلاوي، عبر حسابها على فيس بوك، منشورا توضح فيه كواليس ظهورها مع الإعلامية بسمة وهبة، وذلك بالتزامن مع تصدرها التريند بسبب هجوم أحد الشيوخ عليها بعد تصريحاتها الأخيرة.

ميار الببلاوي ترد على الهجوم عليها

وكتبت ميار الببلاوي: كل الناس عماله تقولى غلطك إني طلعتي في برنامج بسمة طيب أقسم بالله ما كنت أعرف أنها هتكون هجومية كده، اتلجمت مكنتش عارفة أرد خالص وكل اللي كان في دماغي إني ألغي الحلقة وليس كل منطوق مقصود.

وأضافت ميار الببلاوي: أنا مطلقتش 11 مرة، كان قصدي أن جوزي على طول بيقول عليا الطلاق يا جماعة دا بتاع البطيخ بيحلف يمين طلاق أن البطيخة حمرا يبقى مراته طالق؟ الناس ماسكه على كلمة واحدة تستاهلي علشان طلعتي مع بسمه خلاص ارحموني.

وأضافت ميار الببلاوي: اعترفت بغلطتي بس أنا صحبتى دعتني لبرنامجها وأنا بحب بسمة ومن زمان وصورنا قبل رمضان بأسبوعين وأنا أقسم بالله عمرى مشفت برنامج العرافة دا قبل كده اللهم حلقه شاكوش ومراته، وعارفه بسمة طيبة وبتحبني فوجئت بالكاركتر اللي كانت متقمصاه في البرنامج كان كل همي أحافظ على هدوئي واحترامي للمكان وارد على أي سؤال بصراحة علشان المصداقية.

تصريحات ميار الببلاوي

واستكملت ميار الببلاوي: أنا كنت ضيفة في برنامج متشاف مع مذيعة كبيرة على قناتين كبار النهار والمحور، وأنا الفلوس فأنا أخدت مبلغ لا يذكر وكنت مصممه أرجعه وألغي الحلقة وأسالوا أستاذ شريف رئيس تحرير البرنامج أرجوكم كفاية نقض واللي حصل فى الفيديو الناس اللي بتقول تمثيل ربنا يحسسكم بالقهرة وبوجع قلب الشريفة الحرة المتقية ربها لما يتقال عليها زانية من شيخ.

وأردفت ميار الببلاوي: أنا غلطت لما قبلت أطلع مع بسمة ويشفعلى جهلي بالبرنامج وطبيعته، وغلطت أنها لما قالتلى 11 مرة مفهمتهاش إن كلامها يعنى أبقى مطلقة، وبعدين محدش ليه دعوة بحياتى الشخصية، جوزى وابني وجوازي خط أحمر من هنا ورايح.

وأوضحت: الناس اللي بتقولي انتى اللي اتكلمتي وقولتي وعاوزين يرحموني أنا كنت بتسأل وبجاوب مش أنا اللي فتحت أي كلام وكنت بحاول أتهرب من الإجابة بس بسمة كانت مستميته على التريند من كلامى مكنتش مديانى فرصة نهائى غير اللي اتمنتج.

وختمت: حياتى الشخصية خط أحمر ودا هيكون شرطى أنا خدت كل الأدوية بس والله من النكد ما قادره أنام، وكمان بدأنا الإجراءات القانونية سمعت إنه مسح الفيديو بس خلاص شوفناه والمستشار القانوني بدأ شغله وحسبي الله ونعم الوكيل وبعتذر على عدم الرد على السادة الصحفيين لأنه لم يعد لدي ما أقوله، والأمر ترك للقانون والقضاء المصري الشامخ وعند الله تجتمع الخصوم.